Umagad Gintiro Sang Iya Ugangan Sa Barotac Nuevo Patay

Municipality of Barotac Nuevo – Wala gid natabangan ang umagad nga gintiro sang iya ugangan sa Barangay Talisay, Barotac Nuevo kagab-i.

Sa pagpangusisa sang Barotac Nuevo police, may daan na nga hiligut-anon ang biktima nga si Ronnie Erefol, 40-anyos sang Barangay Talisay, Barotac Nuevo, kag iya ugangan nga si Nelson Delmo, 50-anyos. Ginpahayag nga ginsulong sang naka-inom nga biktima ang iya ugangan alas-6:30 kaina sang gab-i tubtob natabu ang pagtiro.

Wala sang recoveries ang mga pulis pero ginapatihan ni Chief Inspector Raymond Celoso, hepe sang Barotac Nuevo Police Station, nga shotgun ang gingamit sang suspek. At-large ang suspetsado samtang dead-on-arrival sa Barotac Nuevo District Hospital si Erefol bangud sang pilas sa tiyan.

(ATT)