Bata sang ginpatay nga empleyada sang Sara-LGU, nagpasalamat sa madasig nga hustisya sa kamatayon sang iya iloy

Iloilo City —  Nagapasalamat ang anak ni Mae Luzuriaga, ang empleyada sang Sara Local Government Unit nga gintiro patay sa kalan-an sa Concepcion sang Huwebes sang gab-i, nga nadakpan ang mga suspetsado sa krimen.

Sa statement nga ginpadala ni alyas JR, 22 anyos sa Aksyon Radyo, nagpasalamat ini sa mga katapo sang NBI, CIDG kag mga pulis sa Sara kag Concepcion nga nahatagan gilayon sang hustisya ang iya iloy matapos nadakpan si PO2 Kevin Piosca sang Sara Police Station nga ginpahayag mastermind kag ang ginatudlo triggerman nga si  Edmar Camangyan alyas Bano sang Barangay Preciosa, Sara. Tuman ka sakit suno kay JR sang natabu bangud mabinuligon kag mabuot ang iya iloy. Si JR ang naga-isahanon nga anak ni Luzuriaga kag isa na ka seaman. Si PO2 Piosca ang ginpahayag karelasyon ni Luzuriaga.  Bulag na sa iya bana ang biktima.  Ginapasa-Diyos na ni JR ang mangin kapalaran sang mga suspek. (JoMaque)