Menor-de-edad, natukiban nga nakasulod sa MO2 Ice sa Smallville Complex matapos gulpi nga natumba kag napilasan sa ulo

Iloilo City–Imbestigaran sang Mandurriao police sa pagpanguna ni Chief Inspector Juvy Navales kon ngaa nakasulod sa MO2 Ice sa Smallville Complex ang menor-de-edad sa tiun pa sang curfew hours.

Natukiban ini matapos nagpablotter ang upod ni alyas Allan, 17-anyos, kaina sang kaagahon sang gulpi nga natumba ang lalaki kag napilasan sa ulo sa sulod sang MO2 Ice. Luyag sang kaupod ni Allan nga makapangayo sang CCTV footage agud mabal-an kon ngaa natumba siya. Ginpahayag nga may naglabay lang nga babaye kag lalaki sa atubang ni Allan antes siya natumba.

Padayon nga ginabulong si Allan sa Western Visayas Medical Center.

Gintinguhaan naman sang Aksyon Radyo nga makuhaan sang komento ang tagdumalahan sang MO2 Ice apang wala pa nakaduty kaina sang aga ang ila manager suno sa guwardya. (AGB)