23 ka menor-de-edad nga naga-inom sang makahulubog nga ilimnon, na-rescue sang taga-WCPD sang Jaro Police Station

Iloilo City–23 ka menor-de-edad ang narescue sang taga-Women and Children Protection Desk sang Jaro Police Station sa Tabuc Suba, Jaro kaina sang hapon.

Suno kay SPO2 Emily Arostique, chief sang WCPD Jaro, may nagpahibalo sa ila nga may pamatan-on nga naga-ilinom sa Banker’s Village gani ila ginrespondehan. Base sa record sa 23 ka narescue, 18 ang mga lalaki kag lima ang babaye–anum sa ila ang mga estudyante sang eskwelahan sa Lapaz samtang 17  halin sa eskwelahan sa Mandurriao. Isa ang naga-edad sang 17; isa ang 16-anyos; apat ang 15; pito ang 14 anyos; lima ang 13 anyos kag lima ang 12 anyos..// Tatlo sa ila ang taga-Lapaz; isa ang taga-Jaro; siyam ang taga-Mandurriao; duha ang taga-Molo; apat ang taga-Pavia kag isa ang taga-Oton.

Nakasuksok pa sang school uniform ang mga menor. Nakumpiskar man sang WCPD ang pitsil sang whisky nga may simbog nga iced tea, mga kutsikyo kag cutter.

Plano ni Arostique nga magpakigdayalugo sa tagdumalahan sang mga eskwelahan kag mga ginikanan sang mga narescue. (AGB)