Ilongga OFW sa Saudi Arabia, nagreklamo nga wala ginapakaun kag gina-swelduhan sang iya amo

Padayon nga naga-communicate sa iya pamilya sa Tigbauan ang Ilongga overseas Filipino workers sa Riyadh, Saudi Arabia nga nagreklamo nga wala ginapakaon sang halos duha ka semana kag wala man nasweldohan sang anum ka bulan.

Suno sa utod nga si Jessy Teves-Baylosis, ginatago sang iya manghod nga si Jona Teves sang Napnapan Norte Tigbauan ang cellphone sini agud indi makita kag makuha sang iya amo. Naga-text sa iya si Jona kag ginasugid ang sitwasyon sini sa Riyadh. Sang nagligad nga semana, nakapanugid man si Jona sa iya magulang nga ginhampak ini sang tray sang iya amo.

Dugang pa ni Jessy, kon wala ang mga amo ni Jona, nagapangita ini sang makaon sa kusina kag ginadala sa iya kuwarto agud kan-on para nga maka-survive.

Nadangup na ni Jessy sa Overseas Workers Welfare Administration 6 ang sitwasyon sang iya utod agud pabalikon ini sa Pilipinas.

Nagpasalig man ang ahensya nga aksyonan ang reklamo. (AGB)