Pamilya sang isa pa ka Ilongga OFW sa Kuwait, nagpangayo sang bulig para ma-rescue ini

Estancia, Iloilo–Nagapakitluoy nga i-rescue ang isa pa ka Ilongga OFW sa Kuwait bangud ginpahayag nga ginapagutuman kag ginasakit siya sang iya amo.

Suno sa utod ni Julie Ann Dianson-Dolar nga si Mary Rose Villariez sang Daan Banwa, Estancia, nagapalangluya na ang iya utod bangud wala ginapakaun sang iya amo nga Lebanese base sa impormasyon nga ila nabaton.

Mayo 2, 2016 sang nagkadto sa Kuwait si Julie Ann kag magatapos kuntani ang iya kontrata sa Mayo subong nga tuig.

Ginsugid ni Mary Rose nga naka-online pa sang nagligad nga semana ang iya magulang kag nagapakitluoy nga i-rescue siya bangud indi na makasarang sa iya sitwasyon.

Nagdangup ang iloy ni Julie Ann sa Overseas Workers Welfare Administration 6 kag nagpasalig ang ahensya nga makadto sa ila balay apang wala pa sang nakabisita nga taga-OWWA sa Estancia. (AGB)