(UPDATE) Sports coordinator sang Negros Occidental sa WVRAA 2018, nag-athag nga indi nila opisyal ang ginreklamo nga nanghaboy sang bottled water sa volleyball game sa CPU

Iloilo City–Indi kabahin sang Negros Occidental delegation ang lalaki nga ginreklamo naghaboy sang plastic bottled water sa professor sang Central Philippine University sa hampang sang Negros Occidental kag Antique sa volleyball secondary girls sang nagapadayon nga Western Visayas Regional Athletic Association Meet.

Nagpaguwa sang statement si Mr. Romeo Sison, sports coordinator sang Negros delegation, kasunod sang pagpapreso ni Dr. Nicolas Guanzon Jr, 59-anyos sang Tigbauan kag professor sa CPU, kay Jose Montalbo, 58-anyos sang Bacolod City kag nagpakilala nga isa sa mga team managers sang Negros Occidental sa WVRAA 2018. Ginakilala man suno kay Sison sang team nga supporter nila si Montalbo pero indi siya kabahin sang official delegation.

Suno kay Dr. Guanzon, nakibot siya sang naigo sa likod sang wala nga paa sang plastic bottled water. Naakig suno sa iya si Montalbo bangud indi makakita sa hampang. Ginpasakaan ni Guanzon sang kaso nga oral defamation kag unjust vexation si Montalbo apang nakapiyansa ang ulihi.

Gintinguhaan sang Aksyon Radyo nga makuhaan sang pahayag si Montalbo ang may report nga nagpauli na ini sa Negros Occidental. (AGB)