(UPDATE) OFW Jona Teves, nakapauli na sa Iloilo

Tigbauan, Iloilo–Nakapauli na sa Iloilo ang Ilongga OFW nga una nagreklamo wala ginpakaun sang halos duha ka semana kag wala man nasweldohan sang anum ka bulan sang iya employer sa Saudi Arabia.

Pasado alas-4 kaina sang hapon sang naghugpa ang eroplano nga ginsakyan ni Jona Teves, 30-anyos sang Brgy. Parara Norte, Tigbauan sa Iloilo International Airport halin sa Ninoy Aquino International Airport.

Kagab-i pa naka-abot si Teves sa Manila upod ang isa pa gid ka OFW nga nagreklamo man sa iya employer apang wala gilayon nakapauli bangud wala nag-abot ang representante sang ila agency nga ginpahayag mahatag sang ila plane ticket pabalik sa Iloilo. Ginsugat si Teves sang iya pamilya sa bulig sang local government unit sang Tigbauan.

Sa pag-abot ni Teves sa Iloilo Airport kaina, ginsaysay sini nga siya ang nagpagita sang paagi agud makacontact sa iya agency kasunod sang ginhimo sang iya amo. (AGB)