Duha ka superintendents halin sa Iloilo nga nalakip sa narcolist ni Presidente Rodrigo Duterte, gindismiss sa serbisyo suno sa NAPOLCOM 6

Iloilo City–Duha ka superintendents halin sa Iloilo nga nalakip sa narcolist ni Presidente Rodrigo Duterte ang gindismiss sa serbisyo.

Gin-confirmar ni Atty. Joseph Celis, director sang National Police Commission ukon NAPOLCOM 6, ang pagdismiss kanday Supt. Ipil Dueñas, assigned sadto sa Iloilo City Police Office, kag Supt. Roderick Condag nga na-assign naman anay sa Iloilo Police Provincial Office.

Si Dueñas suno kay Celis ang na-dismiss bangud sang conduct unbecoming of a police officer. Base sa pagpangusisa sang NAPOLCOM, napaslawan si Dueñas nga magtuman sa iya trabaho bilang intel officer sang ICPO nga nagresulta sa paglapnag sang illegal nga druga Si Supt. Condag naman, gindismiss bangud ang incompetence kag gross neglect of duty.

Magluwas kanday Dueñas kag Condag, gindismiss man sanday PO1 Erwin Salido nga assign sadto sa Roxas City bangud sang pag-falsify sang iya mga dokumento kag si PO1 Richie Ruiz sang Balete, Aklan bangud sang physical injuries.

Kanselado ang eligibility, gin-forfeit kag retirement benefits kag indi maka-apply sa anuman nga posisyon sa gobyerno ang mga natungdan. (AGB)