(UPDATE) Mga crew sang hulbot-hulbot nga nagpalagyo sang tuyo dakpon bangud sa ginpahayag illegal nga pagpangisda sa Concepcion, kasuhan sang Bantay Dagat Task Force

Concepcion, Iloilo— Pasakaan sang Provincial Bantay Dagat sang kaso ang mga crew sang trawl boat ukon hulbot-hulbot nga nagpalagyo sang ila tuyo dakpon bangud ginpahayag nga illegal nga nagapangisda sa kadagatan sang Balidian Island, Concepcion.

Suno kay PO3 Philip Canioso nga team leader sang Iloilo Provincial Bantay Dagat Task Force, kaso nga paglapas sa Fisheries Law, direct assault kag frustrated homicide ang ipasaka nila batuk sa mga crew sang FB Glory.

Nasamaran ang duha ka civilian crew sang Bantay Dagat nga sanday Jerry Espolong kag Reyan Celis kag padayon nga ginabulong sa Sara District Hospital sang may natabu nga komosyon sang tuyo nila dakpon ang mga crew sa kadagatan sang Sagay, Negros Occidental. May mga bukol sa ulo kag pilas sa kamot tuga sang kutsilyo si Espolong samtang may pilas sang pagkalampos si Celis.

Anum ka crew sang FB Glory ang gindala pabalik sa Iloilo kag ginpreso sa Concepcion Police Station samtang may narecover sa hulbot-hulbot nga mga binangon kag kutsilyo suno kay Canioso.

Gina-imbestigaran pa suno kay Canioso kon sin-o ang nagbuno-patay sa kapitan sang trawl boat nga si Vivencio Espinosa kag nagbuno sa iya utod nga si Jonel Espinosa. (AGB)