(UPDATE) Councilor Plaridel Nava, indi magduha-duha nga lampusan sang dos-por-dos si Congressman Jerry Treñas kon dayunon ang pagpadalagan nga mayor sa 2019 elections

Iloilo City–Seryoso kag indi magduha-duha si Councilor Plaridel Nava nga lampusan sang dos por dos si Lone District Cong. Jerry Treñas kon ini lang ang paagi agud magbugtaw ang kongresista nga indi na siya kinahanglan sang syudad kag untatan ang pagpang-intu.

Reaksyon ini sang konsehal sa plano ni Treñas nga magkandidato sa pagka-mayor sa 2019 elections. Suno kay Nava, nagakabalaka siya sa syudad gani gina-share niya sa mga pumuluyo ang iya sentimiento.

Para kay Nava, indi na kinahanglan sang syudad si Treñas bangud sa sulod sang siyam ka tuig niya nga pagpungko bilang kongresista kag siyam ka tuig bilang alkalde, wala ini nagpanindugan sa kawsa batuk sa illegal nga druga kag korapsyon sa syudad.  Wala gid suno sa iya gindala ni Treñas ang tingog sang mga pumuluyo sa kongreso.

Ginapa-abot na ni Nava ang plano ni Treñas nga magpadalagan sa pagka-alkalde bangud wala suno sa suno sa iya sang ‘word of honor’ kag sinsiridad ang kongresista. Gintumod sang konsehal ang pag-hibi-hibi sang kongresista sa iya birthday sang December 2016 sang nagdeklarar ini nga mauntat na sa politika.

Ginpahayag ni Nava nga handa siya magpangampanya batuk kay Congressman Treñas sa mga barangay agud lang mapa-intiendi sa mga pumuluyo nga indi na kinahanglan sang syudad ang kongresista. Gin-athag pa ni Nava nga kon indi siya magpanindugan, wala sang may mangisog nga magkontra kay Treñas kag mangin wala sang pulos ang ginsuguran niya nga kawsa sadtu. (AGB)