Suspek sa paglabu kag pagtiro patay sa duha ka lalaki sa Miag-ao, nanginwala nga kaupod niya ang iya duha ka bata sa paghimo sang krimen

Miag-ao, Iloilo— Gin-ako ni Winsor Fabillo, 62-anyos, sang Barangay Malagyan, Miag-ao nga siya ang nagtiro kag naglabu patay sa kanday Rene Morante, 36-anyos, kag alyas Abel sa Barangay Indag-an kagab-i.

Apang nanginwala si Fabillo nga kaupod niya sa paghimo sang krimen ang iya duha ka bata nga sanday Marwin, 31-anyos, kag Bryan, 26-anyos.  Suno kay Winsor, nagkadto siya sa ila kamalig agud i-secure ang ila propedad kag karabaw sa kabalaka nga saskuhan naman nanday Rene kag Abel nga iya gin-alegar nga may pagka-abusador.

Ginpahayag sini nga nakibot siya sang may nagbato sa kamalig kag ginsundan sang lupok sang pusil gani nga nagbalos man siya palupok. Gin-ako sini nga may dala siya nga 22 kag 45 nga kalibre sang pusil. Dugang sini, napuno na siya bangud magluwas nga ginpahug nga patyon nanday Rene kag Abel, ginpahayag nga naka-agi man ginguba sang mag-abyan ang ila kudal kag ginpalikaw sa ila talamnan ang tubig halin sa irigasyon.

Nanginwala man sanday Marwin kag Bryan nga nakabulig sila sa pagpatay sa mag-abyan.

Positibo naman nga gintudlo ni Riza Esclada nga ang mag-utod nga Marwin kag Bryan ang nagpuli sa iya live-in partner nga si Rene apang wala siya nakakita kon sin-o ang nagpatay kay Abel.

Suno kay Riza, tinawo lang ang iya live-in partner nagapanag-iya sang duta nga ila ginateniran. Apang gina-claim man sang mga Fabillo nga sakup sang ila duta ang ginatamnan sang mga saging.

Nadakpan sa follow-up operation ang mag-amay nga Fabillo kaina sang kaagahon. (AGB)