Councilor Plaridel Nava, nagapati nga seryoso ang maathag nga balana sa tunga nanday Mayor Espinosa kag Cong. Treñas

Iloilo City —  Nagapati si Councilor Plaridel Nava nga seryoso ang nagakatabu sa tunga nanday Mayor Joe Espinosa kag Congressman Jerry Treñas.

Gintumod ni Nava ang pagpatawag ni Mayor Espinosa paagi sa iya salaligan nga si Mr. Jojo Castro sa mga opisyal sa City Hall nga identified kay Congressman Treñas sang nagligad nga Biernes.

Suno sa konsehal, wala man sang makuha ang duha kon magdrama-drama sila.

Gin-ako ni Nava nga mabakud sanday Treñas kag Espinosa bisan magbulagay sila sa masunod nga eleksyon. Sa bahin naman sang oposisyon, isa sa mga ginakonsiderar suno kay Nava ang pagtingub nila sang pwersa sa isa sa duha ka grupo.

Apang sa opinion ni Nava, mas acceptable si Espinosa sang sa kay Treñas. Ginpahayag pa sang konsehal nga dapat magtingub sila agud mapahalin na sa panghimanwa ang kongresista. (JoMaque)