13 ka classrooms sang Leganes Central Elem. School, ginransak
Leganes, Iloilo — Ginransak sang indi magnubo sa duha ka kawatan ang 13 ka mga rooms lakip ang canteen kag clinic sa Leganes Central Elementary School kaina sang kaagahon.
Suno kay Senior Inspector Dadje De Lima, hepe sang Leganes Police Station, ginguba sang wala makilal-an nga mga kawatan ang door knobs sang mga rooms kag ginkuha man nila ang mga jalousie.
May watchman ang eskwelahan suno kay De Lima apang nagapuli siya kun mag las dos sang kaagahon.
Nakawat sa eskwelahan ang 30-inch nga TV, printer, lapel kag mga coins nga nakolekta sang mga manunudlo nga ginabanta nagabalor tanan sang Php 27,000.
Una nga nakawatan ang eskwelahan sang Enero kag Pebrero. (JoMaque)