Mga kaupod ni Sam Aguilar sang gintiro ang iya salakyan sa Tigbauan nga gintunaan sang kamatayon sang STL operator, ginakabig sang mga pulis nga suspek; PRO 6, nanginwala nga malagana sa pag-imbestigar sa krimen

Iloilo–Ginakabig nga suspects sa pagtiro patay kay the late Sam Aguilar, operator sang Small Town Lottery sa probinsya, ang anum niya ka kaupod sa van sang natabu ang krimen sa Brgy. Buyu-an, Tigbauan sang Marso 13.

Suno kay Iloilo Police Provincial Office Director PSSUPT Marlon Tayaba, ginakonsiderar nila ang tanan nga anggulo sa krimen. Nagalibog naman ang ulo sang mga pulis kun nga-a si Aguilar lang ang gintiro sang suspect kag kon paano nahibaluan sang gunman ang iya ginapungkuan bangud tinted ang salakyan.

Tatlo na sa kaupod ni Aguilar ang na-interview sang mga pulis. May impormasyon suno kay Tayaba nga ginkuha sang isa sa mga body guards ang tatlo ka cameras sa van nga dako kuntani ang mabulig sa pagsolbar sang kaso.

‘Indi malagana’

Nanginwala naman ang Police Regional Office 6 nga malagana sila sa pag-imbestigar agud mahatagan hustisya ang natabu kay Aguilar.

Suno kay PRO 6 Spokesperson PSUPT Gilbert Gorero, padayon ang imbestigasyon sang mga pulis sa probinsya sa pagpamuno ni IPPO Director Tayaba.

Nagahingyo naman si Gorero sang kooperasyon sang mga kaupdanan ni Agular agud mas madasig ang pagsolbar sa krimen. (AGB)