Hepe Sang Tigbauan Police Station Nag-Ako Nga Nabudlayan Sa Imbestigasyon Sa Pagtiro-Patay Kay Sam Aguilar Nga Operator Sang STL Sa Prbinsiya

Tigbauan, Iloilo — Gin-ako sang hepe sang Tigbauan Police Station nga nabudlayan sila sa imbestigasyon sa pagtiro-patay kay Mr. Sam Aguilar, operator sang STL sa probinsya kag CEO sang Eagle Crest Gaming and Holding Corporation sa Brgy. Buyu-an, Tigbauan.

Suno kay Senior Inspector Hermogenes Eulatic, indi klaro ang kuha sang CCTV kag may helmet man ang riding in tandem nga ginapatihan nagtiro kay Aguilar.

Dugang niya, wala nila na-istorya si Aguilar sugod sang gindala siya sa ospital sang Marso 13. Wala man sang may nahatag nga kongkreto nga detalye ang mga upod ni Aguilar sa salakyan sang nagluntad ang insidente.

Pwede i-angut ang krimen suno kay Eulatic sa pag-ambush kay Aguilar sa Manila.

Lakip sa ginasundan nga anggulo sang pulis nga motibo sa krimen ang business rivalry kag personal grudge.

(ATT)