Operator Sang STL Sa Probinsya Nga Si Sam Aguilar Nagtaliwan Samtang Ginabulong Sa Ospital

Mandurriao, Iloilo City — Napatay samtang ginabulong sa The Medical City ang operator sang Small Town Lottery sa probinsya kag Chief Operating Officer sang Eagle Crest Gaming and Holding Corporation nga si Mr. Sam Aguilar, 47-anyos.

Suno kay Atty. John Leo Solinap, legal counsel sang pamilya Aguilar, 11:30 P.M.  sang sabado nagtaliwan si Aguilar.

Base sa resulta sang pag-autopsy ni Dr. Owen Libaquin, medico-legal officer sang Police Regional Office 6, sa bangkay ni Aguilar, may tatlo ka patal nga pilas sa likod ang biktima ; duha diri nahamtang sa wala nga kilid kag isa sa tuo nga kilid malapit sa pigtot. Dugang niya, naglapos ang isa ka bala sa tuo nga paa ni Aguilar.

Naigo suno kay Dr. Libaquin ang kidney, colon kag wala nga baga sang biktima kag nautod man ang duha niya ka tina-e.

May nakuha naman nga metallic fragment si Dr. Libaquin nga posible halin sa bala sang M16.

Matandaan, gintiro ang van ni Aguilar sa Brgy. Buyu-an, Tigbauan sang Marso 13 sang wala pa makilala nga riding in tandem.

(ATT)