Coast Guard Iloilo, wala sang narecord nga mga insidente sa dagat sang Semana Santa

Iloilo City–Wala sang narecord nga mga insidente sa dagat ang Coast Guard Iloilo sa pag-obserbar sang Semana Santa.

Suno kay Lieutenant Senior Grade Rodolfo Dela Peña, commander sang Coast Guard Iloilo Station, matalunsay kag safe ang pagbiyahe sang mga pumpboats halin sa Ortiz Wharf pakadto sa Bondolan Point kag Jordan Wharf sa Guimaras sang Huwebes kag Biernes Santo.

Nangin madinalag-on ang Oplan Biyaheng Ayos suno kay Dela Peña bangud sa bulig sang Coast Guard Auxiliary kag pagkooperar sang local government units kag mga pasahero nga nagsaksi sang tuigan nga Pagtaltal sa Balaan Bukid.

Magluwas sa mga turista kag tumuluo nga nagpadulong sa Guimaras, gintutukan man sang Coast Guard sa pagbantay ang mga beaches sa iban nga parte sang Iloilo.

Ang Oplang Biyaheng Ayos suno kay Dela Peña, magatapos sa Abril 5. (AGB)