OFW nga iloy sang lalaki nga gintiro patay sang retired police officer sa Mandurriao, mapauli sa Iloilo agud magpasaka sang kaso batuk sa suspek

Hongkong–Mapauli sa Pilipinas subong nga semana ang iloy sang lalaki nga gintiro patay sang retirado nga pulis sa Bolilao, Mandurriao agud mag-file sang kaso batuk sa suspetsado.

Desidido si Mrs. Remalyn Ariate nga mahatagan sang hustisya ang kamatayon sang iya bata nga si Jorem, 21 anyos kag pagkapilas sang iya bana nga si Joseph.

Nagasakit ang buot ni Remalyn sa natabu bangud nagpasalig pa si Jorem sa ila nga mabulig sa tion nga matapos ang iya kontrata sa Hongkong. Apang nadula na suno sa iya ang amu nga handum matapos ini ginpatay sang iya kumpare nga si retired SPO1 Ariel Acopicop nga wala sang madalum nga rason.

Palamangkutanon man kay Remalyn kun ngaa gintiro man ni Acopicop ang iban pa niya nga bata nga lalaki bisan wala sang sala.

Nagpangabay si Remalyn sa asawa ni Acopicop nga engganyuhon ang iya bana nga magsurrender kag sabton ang iya ginhimo nga sala. (AGB)