DPWH 6, nagpadala sang 20 ka heavy equipment kag 150 ka mga tinawo sa Boracay para sa rehabilitasyon sang isla

Boracay Island — Napadala na sa Aklan ang mga heavy equipment sang Department of Public Works and Highways regional office 6 nga gamiton para sa rehabilitasyon sang Boracay sugod buwas.

Suno kay DPWH 6 Assistant Director Engr. Al Fruto, ginabanta 20 ka heavy equipment pareho sang back hoe kag mga dump trucks ang nag-abot na Boracay sugod kahapon. 150 man ka tinawo sang DPWH ang maabot sa Boracay para magbulig sa pagpangbakbak kag iban pa nga obra.

Tutukan sang DPWH sa pagsugod sang closure buwas ang paghawan sang main road halin sa Cagban Port  pakadto sa circumferential road ilabe na sa una nga lima ka kilometro. Ipatuman suno kay Fruto ang 12 ka metro nga road right of way kag ginabanta sa masobra 300 ka istruktura ang madalasa.

Sa pagtapos sang rehabilitasyon suno kay Fruto, mas malapad na ang main road, may footwalk, may tanum sa kilid kag may drainage. (JoMaque)