Duha ka ginapatihan NPA members, patay sa engkwentro sa Miag-ao

Miag-ao, Iloilo–Patay ang ang duha ka ginapatihan miembro sang New People’s Army sa engkuwentro batuk sa mga suldado sang 61st Infantry Battalion sa Sitio Anoy, Brgy. Cabalaunan alas 5:49 kaina sang kaagahon.

Suno kay Brig. General Pio Diñoso, Commander sang 301st Infantry Brigade, nakabaton sila sang impormasyon nga nagahimo sang extortion kag recruitment activities ang mga rebelde sa lugar gani naghimo sang community patrol operation ang mga suldado. Apang pag-abot sa lugar, una nga nagpalupok ang mga rebelde suno kay Diñoso kag nagbalos ang mga suldado.

Naglawig suno sa iya sang napulo ka minutos ang firefight. Ginabanta sa 15 ang naka-engkuwentro sang mga suldado suno kay Diñoso.

Madasig nga nagpalagyo ang mga kaaway pakadtu sa kaiping nga Brgy. Ongyod. Narecover sa lugar ang duha ka high-powered firearms nga AK47 kag M16 rifle.

Ginkilala ang napatay nga rebelde nga si alyas Bebot Goma, ginapatihan leader sang NPA samtang unidentified ang isa pa ka napatay. Wala naman sang casualty ukon napilasan sa mga suldado. (AGB)