Tatlo ka soldado, pilason sa paglupok sang IED sa Calinog

Calinog, Iloilo–Pilason ang tatlo ka suldado sang naglupok ang improvised explosive device nga gintanum sang mga ginapatihan katapo sang New People’s Army sa Brgy. Caratagan, Calinog alas 7:50 kaina sang aga.

Ginsundan ini sang engkuwentro sa tunga sang mga suldado kag mga rebelde suno kay Brig. General Pio Diñoso, Commander sang 301st Infantry Brigade.

Nakabaton sang impormasyon ang mga suldado nga may presensya sang mga NPA members sa lugar gani ila ginkadtuan. Apang pag-abot nila, naglupok ang IED nga nagresulta sa menor nga pagkapilas sang tatlo ka mga suldado.

Madasig naman nga nagpalagyo ang ginabanta 10 ka mga rebelde matapos nga nagpalupok sa mga suldado.

Nagapati si Diñoso nga posible naka-alerto na ang mga rebelde bangud may engkuwentro man sa Sitio Anoy, Brgy. Cabalaunan, Miagao alas 5:49 kaina sang kaagahon gani wala na sila nasorpresa sang nag-abot ang mga suldado.

Dugang pa ni Diñoso, posible nga mga NPA members nga naga-operate sa Central Panay ang naka-engkuwentro sang mga suldado sa Barangay Caratagan. (AGB)