Duha ka ginapatihan NPA members nga napatay sa engkuwentro sa Miagao, nakilala na
Miagao, Iloilo — (UPDATE) Nakilala na ang duha ka ginapatihan miembro sang New Peoples Army nga napatay kasunod sang engkwentro sa tunga sang Philippine Army kag rebelde nga grupo sa Sitio Anoy, Brgy. Cabalaunan Sabado sang aga.
Suno kay Chief Inspector Johnny Tumambing, hepe sang Miagao Police Station,ang mga napatay amo kanday Elvin Tanatoy, 27-anyos sang Brgy. Tagpu-an, Tubungan kag Domingo Sevano Jr., 33-anyos sang Brgy. Bikil sang amo man nga banwa.
Ginclaim ang mga bangkay sang ila tagsa ka pamilya kaina sang aga.
Wala naman nagkomento ang pamilya nanday Tanatoy kag Sevano suno kay Tumambing natuhoy sa ila kaangtanan sa NPA.
Una na ginpahayag ni Tumambing nga miembro sang rebelde nga grupo ang mga napatay base sa kunfirmasyon sang 61st Infantry Batallion.
Nahamyang sa punerarya sa Miagao ang mga bangkay kag subject sa autopsy examination.
Ginpahayag ni Tumambing nga sa likod sang ulo ang pilas ni Sevano tuga sang pagluthang samtang sa wala nga dughan naman kay Tanatoy. (JoMaque)