Bulig pinansyal kag iban pa nga assistance, ginpasalig sang PRO 6 sa pulis nga nasunugan kag napatyan sang pamilya sa Lapaz

Iloilo City — Nagpasalig si Police Regional Office 6 Director Cesar Hawthorne Binag sang anuman nga bulig kay SPO2 Richard Gerafusco nga napatyan sang asawa, bata, ugangan kag tiya sa sunog sa San Isidro, Lapaz sang Domingo sang kaagahon.

Suno kay PRO 6 spokesperson Supt. Joem Malong, nagpasalig si Binag nga baklan sang uniform si Gerafusco bangud nadala ang iya mga uniform sa sunog.  Magluwas sa financial nga bulig kay Gerafusco, ginaproseso man ang insurance sang pulis agud makakuha ini sang benepisyo. Napatay sa sunog ang asawa ni Gerafusco nga si Evangeline, bata nila nga si Richard Jr, ugangan nga si Elvira Avelino kag tiya nga si Maria Christina Dollente.

Ginconfirmar ni Malong nga gintanyagan si Gerafusco nga magtenir sa barracks sa Kampo Delgado kon wala ini sang istaran. Gin-ako ni SPO2 Gerafusco nga ginsurrender niya sa ila supply officer sa Lapaz Police Station ang iya service firearm agud indi siya makapaminsar sang malain. Nagaisahanon na lang si Gerafusco bangud napatay man sang nagligad nga tuig ang kamagulangan niya nga bata bangud sa aneurysm. (JoMaque)