Lima ka ginpahayag ‘racket’ sang mga traffic aides sa syudad, gin-isa-isa ni PSTMO head Jeck Conlu

Iloilo City–Gin-isa isa ni Public Safety and Transportation Management Office (PSTMO) Head Jeck Conlu ang ginpahayag lima ka mga “racket” sang 21 ka mga traffic aides sa syudad.

Suno kay Conlu, may traffic aide nga SEAMAN nga  nagasaka-panaug sa jeep agud mangilkil sa mga jeepney drivers; may ara man daw KORIDOR nga nagapakuno-kuno nga mapataya sang STL sa driver apang sa pagkamatuod, mangilkil sang kuwarta.  May ara man NEGOSYANTE nga nagabaligya sang tinapay kag bottled water sa mahal nga presyo.

Dugang ni Conlu, may traffic aide nga TOURIST GUIDE ukon naga-escort sa driver sang mga trucks bisan may truck ban. Sa modus naman nga TUMBO, ginahabuyan sang jeepney driver asng sinsilyo ang traffic aide kag iya madasig nga ginapulot.

Ginpatawag ni Conlu ang 21 ka traffic aides agud pamangkuton sa ila ginpahayag racket apang lunsay sila nagpanghiwala. Ginapa-monitor ni Conlu ang nasambit nga mga traffic aides kag kon may ebidensya sa ila ginahimo, gilayon nga pahalinon.

Ginapatun-an man ni Conlu sa City Legal Office kon puwede siya kapaguwa sang mandu  nga magadumili sa mga traffic aides nga magpang-racket sa karsada, may duty man ukon off duty. (AGB)