Ginpahayag “Racket” Sang Mga Traffic Aides Sa Syudad Ginbuyagyag Sang PSTMO

Iloilo City — Nagkalain-lain ang ginpahayag ‘racket’ sang mga traffic aides sa syudad nga ginpatawag ni Public Safety and Transportation Management Office Head Jeck Conlu.

Suno kay Conlu, may traffic aide nga SEAMAN nga nagasaka-panaug sa jeep agud mangilkil sa mga jeepney drivers; may ara man daw KORIDOR nga nagapakuno-kuno mapataya sang STL sa driver apang sa pagkamatuod, nagapangilkil. May ara man NEGOSYANTE nga nagabaligya sang tinapay kag bottled water sa mahal nga presyo.

Dugang ni Conlu, may traffic aide nga kapareho sang TOUR GUIDE nga naga-escort sa driver sang mga trucks bisan may truck ban. Sa modus naman nga TUMBO, ginahabuyan sang jeepney driver sang sinsilyo ang traffic aide kag iya madasig nga ginapulot.

Nanginwala suno kay Conlu ang 21 ka traffic aides nga may racket sila apang iya na ginapamonitor ang mga ini kag kon may ebidensya sa ila ginahimo, gilayon nga pahalinon.

Ginapatun-an man ni Conlu sa City Legal Office kon puwede siya kapaguwa sang mandu  nga magadumili sa mga traffic aides nga magpang-racket sa karsada, may duty man ukon off duty.

(AT)