Korte Suprema, nagkakas kay Chief Justice Maria Lourdes Sereno; Sereno, pwede makafile sang motion for reconsideration suno sa Ilonggo nga abogado

Manila–Kakas na sa pwesto si Maria Lourdes Sereno bilang chief justice sang Korte Suprema kasunod sang landmark decision sang mga justices nga nagpabor sa quo warranto petition ni Solicitor General Jose Calida kaina sang aga.

Ginbasa ni SC spokesperson Theodore Te ang desisyon pagkatapos sang special en banc session nga 8-6 ang nagboto pabor sa petition nga nagatuyo sa pag-invalidate sang appointment ni Sereno sa pinakamataas nga posisyon sa judiciary sang 2012. Immediately executory ang ruling kag ginmanduan ang Judicial and Bar Council nga suguran na ang application process para sa masunod nga chief justice.

Nagboto pabor sa quo warranto petition sanday justices Teresita Leonardo-De Castro, Diosdado Peralta, Lucas Bersamin, Francis Jardeleza, Samuel Martires, Noel Tijam, Andres Reyes Jr kag Alexander Gesmundo. Nagpamatuk naman sanday senior associated justice Antonio Carpio, justices Presbitero Velasco, Perlas Bernabe, Mariano Del Castillo, Marvic Leonen kag Benjamin Caguioa.

Sa isyu naman kon proper remedy ang quo warranto, siyam ang nagboto pabor nga ginabug-usan nanday Velasco, De Castro, Peralta, Bersamin, Jardeleza, Martires, Tijam, Reyes kag Gesmundo. Sa isyu kon naglapas si Sereno sang Constitution bangud sa kapaslawan nga magfile sang iya SALN, siyam ang nagboto sang yes nga sanday Carpio, De Castro, Peralta, Bersamin, Jardeleza, Martires, Tijam, Reyes kag Gesmundo.

Ginhatagan sang 15 ka adlaw si Sereno nga magfile sang Motion for Consideration. Ginhatagan man siya sang 10 ka adlaw nga mag-SHOW CAUSE kon ngaa indi ini pag-i-sanction bangud sa paglapas sang Code of Professional Responsibility kag Code of Judicial Conduct sa paglapas sang sub judice rule kag pagduda sang malain sa mga miembro sang Korte Suprema.

Pwede naman makafile sang MR si Sereno suno kay Atty. Eldrid Antiquiera. Apang sa subong, dapat gid bakantehon ni Sereno ang posisyon bangud immediately executory ang ruling.

Indi pa makahatag sang dugang nga komento si Antiquiera bangud wala pa nabasa ang malawig nga desisyon sang mga nagpabor sa quo warranto. Pero gin-athag ni Antiquiera nga nabutang sa laye nga pwede makafile sang quo warranto agud kwestyunon ang validity sang appointment sang nagatrabaho sa gobyerno.

Legal suno kay Antiquiera ang desisyon bangud Korte Suprema na ang nagpaguwa sini. (AGB)