2 patay lakip ang barangay kagawad-elect sa tiruhay sa Dumarao, Capiz

Capiz — Duha ang patay lakip ang barangay kagawad-elect sa tiruhay sa Sagrada Familia, Dumarao, Capiz kahapon.

Gindala pa sa Barotac Viejo District Hospital si kagawad-elect Raymando Montaño, 44 anyos, apang napatay samtang ginabulong sa amo man nga ospital ang iya utod nga si Rex Montaño, 30-anyos. Napatay naman samtang ginabulong sa Don Ramon Tugbang Medical Center sa Barotac Viejo ang gintudlo kaaway ni Raymando nga si Arnel Putente nga may multiple gunshot wounds.

Suno sa utod sang mga Montaño nga si Layla, nakita niya sang paguwa siya sa balay sang ila tiya nga akig si Putente kag may bitbit nga pusil gani iya ginkup-an.  Ginpahayag ni Layla nga nga gin-unahan si Putente gabot sang pusil sang napatay nga si Raymando. Wala sang ideya si Layla kon ano gid ang ginhalinan sang away sang iya manghod kag ni Putente nga live-in partner sang ila pakaisa. Indi man makahambal si Layla kon ang bag-o lang natapos nga eleksyon ang rason bangud ayuhay pa man ang ila pamilya kag si Putente antes ang insidente.

Ang napatay, nagasuporta sa incumbent punong barangay nga liwat nagdaug. Nagasuporta naman suno kay Layla sa kasumpong sang incumbent si Putente. (JoMaque)