Amay nga nagapamasura agud may ipakaun sa iya pamilya matapos wala na ginswelduhan sang iya amo, nagpasalamat sa mga nagbulig agud makapauli sila sa Negros island

Iloilo City–Nagapasalamat ang amay sa mga nagbulig agud makapauli sa Hinoba-an, Negros Occidental ang iya pamilya.

Suno kay Rene Flores, nagpamasura siya agud lang may ipakaun sa iya pamilya. Antes naka-abot sa Iloilo, ginhire si Rene nga manugbubod sang inugbulan nga mga manok ni alyas Boy Villanueva sa Antique. Apang sa duha ka bulan nga pag-obra suno kay Rene, mil 400 lang ang ginhatag sa iya nga sweldo kag sang ulihi, naputo ang iya amo bangud mahilig magbulang gani ginpangbaligya sini ang mga manok.

Ginpahayag ni Rene nga ginhatagan lang siya sang 35 pesos ni Villanueva agud magpauli gani nga nag-ayo ini sa delivery truck sang softdrinks nga pasakyon sila sang iya pamilya pakadto sa Iloilo. Kaupod ni Rene ang iya asawa nga si Manilyn kag tatlo nila ka bata nga lalaki nga naga-edad pito kag lima ka tuig kag siyam ka bulan.

Una nga nakita ni Reynaldo Espeja, 23 anyos sang Pototan, upod sa iya churchmate ang pamilya ni Rene gani iya ginpost ang istorya sa Facebook sa paglaum nga may mabulig sa mga ini. (AGB)