Police Regional Office 6, nakaplastar na sang security scheme sa pagbukas sang klase

Camp Delgado, Iloilo City–Nakaplastar na ang Police Regional Office 6 sang mga tikang agud nga mapabilin nga malinong kag matawhay ang pagbukas sang klase sa Hunyo 4 para sa School Year 2018-2019.

Ini ang pagpabutyag ni PRO 6 Director PCSUPT Cesar Hawthorbe Binag kasunod sang pagpabugal nga nagnubo ang kriminalidad sa rehiyon sa bag-o lang natapos nga Barangay kag SK elections. Suno kay Binag, may i-deploy nga mga pulis sa mga eskwelahan magluwas pa sa ipalapta sa dalanon.

Posible suno kay Binag nga may magapamintaha ukon mangsalisi bangud masako ang transaksyon sang kwarta sa pagbukas sang klase apang naka-alerto ang mga pulis.

Naghingyo si Binag sang kooperasyon sang tanan agud malikawan ang mga insidente sa pagbalik eskwela sang mga estudyante. (AGB)