Transport group ICLAJODA, indi mag-upod sa ‘surge pricing’ scheme sang mga jeepney operators sa Manila

Iloilo City–Wala sang ideya ang Iloilo City Loop Alliance of Jeepney Owners and Drivers Association ukon ICLAJODA sa ginaduso sang mga jeepney operators sa Metro Manila nga ‘surge pricing’ ukon dugang nga plete kon sang peak hours.

Suno kay ICLAJODA President Raymundo ‘Boyet’ Parcon, may ara sila separado nga petition angut sa pagpatuman sang provisional increase sa regular fare.

Kon paminsaron suno kay Parcon, madamu man ang nagasakay sa mga jeep kon peak hours sa syudad gani indi na kinahanglan ang surge pricing scheme.

Nag-file sang petition ang ICLAJODA sa Land Transportation Franchising and Regulatory Board ukon LTFRB nga para sa 9 pesos nga regular fare.

Ginrason ni Parcon nga nagawangal ang mga jeepney drivers bangud sa sunod-sunod nga saka sa presyo sang gatong kag pagmahal sang mga balaklon nga ila ginabasol sa TRAIN law. (AGB)