Mga isyu batuk sa Panay Electric Company, gintalakay sa public hearing sang Senate Committee on Public Services sa Provincial Capitol SP Session Hall kaina

Iloilo City–Nangin mainit ang diskusyon sang Senate Committe on Public Services nga ginapamunuan ni Senador Grace Poe sa mga rekamo batuk sa Panay Electric Company.

Suno sa senador, madamo siya sang nabaton nga mga reklamo batuk sa PECO. Apang naandan na suno sa iya nga madamo ang nagareklamo sa electric distribution utility.

Ginpresentar ni Councilor Joshua Alim sa hearing sa Provincial Capitol kaina sang aga ang isyu sa overbilling kag iban pa nga mga reklamo batuk sa PECO.

Nagdepensa naman si Mikel Afzelius, corporate communicaton officer sang PECO, nga kalabanan sang mga konsumidor nila nga may reklamo ang na-areglo na.

Ginpahayag ni Poe nga bantayan niya kun magsaka na sa senado ang application for franchise renewal sang PECO.

Magluwas sa reklamo sa PECO, nadiskusyunan man sa hearing ang epekto sang TRAIN Law, serbisyo sang Metro Iloilo Water District, pagconvert kag pagtukod sang mga opisina sang Land Transportation Office sa Western Visayas kag mga prangkisa sang pila ka radio corporation kag broadcasting station.

Nagtambong man sa committee hearing sanday senators JV Ejercito kag Nancy Binay, Congressman Jerry Treñas kag Vice Governor Christine Garin. (AGB)