Tul-an ni Ilonggo OFW Angelo Claveria nga nasapwan sa water purifying tank sa South Korea, nag-abot sa Iloilo
Cabatuan, Iloilo — Nangin emotional ang pamilya kag mga abyan ni Angelo Claveria, sang nag-abot ang mga tul-an sini sa Iloilo Internal Airport kaina sang aga.
Si Claveria ang Ilonggo OFW nga nasapwan ang mga tul-an sa water purifying tank sa South Korea.
Gindiretso sa Amoroso-Solania Funeral Homes ang tul-an ni Angelo antes gindala sa ila balay sa Rizal Ilaya, Poblacion.
Gintalana sang pamilya Claveria sa Hunyo 1 ang lubong ni Angelo.
Magaabot man subong nga hapon sanday Special Asst. to the President Christopher “Bong” Go kag Presidential Communications and Operations Office Secretary Martin Andanar agud magbisita sa hamyang ni Angelo.
Suno kay SAP Bong Go, himoon sang gobierno ang tanan nga masarangan agud mahatagan sang hustisya ang kamatayon ni Angelo Claveria.
Ginpahayag ni Go nga nagpangabay sa iya ang utod ni Angelo nga si Janet nga mapadasig ang pagpauli sa mga tul-an sini sa Pilipinas.
Mapadulong suno sa iya sa Korea si Presidente Duterte sa Hunyo 3 kag isa sa ipalab-ot sini nga concern ang kaso ni Claveria kag hingyuon sa Korean government nga mahatagan sang hustisya ang kamatayon sang Ilonggo OFW.
Ginhatagan sang gobyerno paagi kay Go ang pamilya Claveria sang Php20,000 nga cash kag Php 220,000 nga tseke. (JoMaque)