Solicitor General Jose Calida, wala sang violation sa pagsulod sang security company sang iya pamilya sa kontrata sa pila ka government agencies suno sa Ilonggo nga abogado

Iloilo City–Wala sang violation si Solicitor General Jose Calida angut sa mga kasugtanan sang security company sang iya pamilya kag pila ka government agencies.

Ini kon basehan ang anti-graft law suno kay Atty. Hector Teodosio.

May salabton lang si Calida suno kay Teodosio kon may direkta ini nga koneksyon sa Department of Justice ukon sa House of Representatives.

Kun sa Code of Conduct and Ethical Standards for Public Officials and Employees naman, may punto suno kay Teodosio si Calida sang naghambal ini nga wala siya naglapas sa kasuguan sang nagresign siya bilang chairman kag presidente sang Vigilant Investigation and Security Agency.

Gintumod ni Teodosio nga antes pa nagsumpa bilang solgen si Calida, tag-iya na siya ukon stockholder sang kompaniya gani wala sang kaangtanan ang office of the solicitor general sa mga kontrata nga ginpirmahan sang iya security agency. (AGB)