Ginapatihan Kerida Ginbuno Sang Asawa Sang Iya Karelasyon

Lapaz, Iloilo — Napilasan sa tuo nga parte sang iya ulo ang 38-anyos nga ginapatihan kerida matapos ginbuno sang asawa sang iya karelasyon sa isa ka unibersidad sa Lapaz.

Suno kay PO1 Marell Tamayo, Women and Children Protection Desk personnel sa Lapaz Police Station, aksidente nga nagkita-anay ang 41-anyos nga bana nga si alyas Carlo upod ang iya kerida nga si alyas Val kag ang iya 40-anyos nga asawa nga si alyas Steph upod naman ang ila nga bata pasado las dos kahapon sang hapon.

Seperado nga nagcheck sang grades sang ila bata ang mag-asawa antes nagluntad ang insidente. Suno kay Val, hinali lang siya gin-atake ni Steph sa atubang sang Registrar’s Office sang natungdan nga unibersidad.

Naguramusay ang asawa kag kerida tubtob nga ginbuno sang suspect ang biktima sang dala niya nga kutsilyo suno sa pulis.

Gindala sa West Visayas State University Medical Center ang kerida kag out-patient na.  Nag-areglohanay na ang magtimbang nga kampo. Tatlo ka tuig na nga indi maayo ang relasyon sang mag-asawa.