Inaway, diutayan lang nag-ibwal sa Sicogon Island sa Carles sang tuyo gub-on sang mga guwardiya sang Ayala ang balay sang pila ka residente sa isla

Carles, Iloilo  (EDITED) — Diutayan lang nga nag-ilinaway ang mga pumuluyo sang Sicogon Island sa Barangay Alipata, Carles  kag mga security guards sang Ayala Corporation.

Sa panaysayon ni Monica Macario, nag-abot ang 18 ka guwardiya sa isla sang Mayo 30, alas 2 sang hapon nga ginpangunahan ni retired Colonel Anselmo Monleon nga ginpahayag armado sang 9mm pistol kag shotgun.

Ginpamilit sang mga guwardiya nga gub-on ang balay nga gina-estaran nanday Macario apang ginpamatukan sang mga pumuluyo. Naghagan-hagan lang suno kay Macario ang tensyon sang nagpatunga si Punong Barangay Rothel Macario.

Apang wala nadayon ang pagguba sang balay sang mag-asawa bangud wala sang gina-uyatan nga demolition order ang mga guwardiya sang Ayala Coporation.

Ginpahayag ni punong barangay Macario nga ginhatagan ang masobra 100 pamilya sa barangay sang Php 150,000 sang 2013 pagkatapos sang pagpanalasa sang Bagyo Yolanda agud maghalin sa isla apang pagkaligad sang tini-on, may pila nga nagbalik sa lugar.

Nanindugan si Monica nga wala niya ginbaton ang gintanyag nga kwarta kabaylo sa ila paghalin sa barangay. Suno sa iya, ginpa-atupan lang niya ang ila balay bangud guba-on na gid.

(JoMaque/ AT)