2nd District BM Liecel Seville Nagpa-Athag Sa Pagduso Sang Ordinansa Nga Magaregulate Sang Sound System Kag Iban Pa Nga Mga Amplified Audio Devices Sa Probinsya

Province of Iloilo — Nagpa-athag si 2nd District Board Member Liecel Seville sa ginaduso nga ordinansa nga magaregulate sang sound system kag iban pa nga amplified audio devices sa probinsya.

Suno kay Seville, napaminsaran niya ang proposed ordinance kasunod sang nabaton nga mga reklamo sang disturbo nga gahud ilabe na kon inugpahuway ukon oras sang inugtulog. Kon mapasar ang ordinansa, indi lang ini maga-epekto kon may fiesta ukon socio-cultural activities kundi sakup man ang nagapatukar sang sobra ka tunog nga telebisyon kag iban pa nga audio device kada adlaw.

Base sa pagtuon suno kay Seville, indi dapat maglapaw sa 90 decibel ang volume nga matolerar sang pamatin-an gani ginbutang niya sa proposed ordinance nga magbakal ang kada barangay sang decibel meter nga magatakus sang katunugon.

Ginpahayag ni Seville nga magluwas sa pagpalamungol, indi man maayo ang dala sang sobra ka tunog nga sound sa ikaayong lawas.

Base sa proposed ordinance, iga-limit sa 90 decibel ang katunugon sang tanan nga sound system kag amplified audio devices sa tanan nga tiun.

Kon may events, dapat pahinayon sa 85 decibel ang volume kag patyon pag-alas-12 sang tungan gab-i.Apang kon may fiesta, tugtan ang pagpatukar sang sound system tubtob alas-2 sa kaagahon.

(att)