Mga dalanon sa syudad, ginlibot ni DPWH ICDEO Head Rodney Gustilo kasunod sang pagtupa sang mabaskog nga ulan

Iloilo City–Ginlibot ni DPWH Iloilo City District Engineering Office Head Engr. Rodney Gustilo ang mga dalanon sa syudad kasunod sang mabaskug nga ulan.

Suno kay Engr. Gustilo, madasig man nga naghubas ang tubig sa mga lugar nga masami sadto ginabahaan. Gintumod sini ang Airport, Mandurriao; Rizal-Ledesma Sts.; Fuestes kag Quezon Streets sa City Proper. Ini suno kay Gustilo bangud man sang mga inlets nga ginbutang sa gintumod nga areas.

Ang pinakaproblemado lang suno kay Gustilo ang Oñate-De Leon sa Mandurriao nga mataas gihapon ang tubig baha nga nagahatag sang perwisyo sa mga motorista. Nagpasalig si Gustilo nga usisaon kon ano gid ang problema sa masami nga pagtenir sang tubig sa nasambit nga area ilabe na sa atubang sang Happy Homes Subdivision.

Gin-athag naman ni Gustilo nga national roads kag projects lang ang yara sa idalum sang ila pagdumala. Ang City Engineer’s Office suno sa iya ang dapat nga may overall plan sang kada barangay ilabe na ang apektado sang pagbaha para ma-compliment sang trabaho sang ahensya. (AGB)