(UPDATE) Saka sa minimum wage sa Western Visayas, maagi pa sa review sang National Wages and Productivity Commission

Iloilo City–Magaagi sa review kag deliberation sang National Wages and Productivity Commission ang P365 nga minimum wage nga gin-aprobahan sang Regional Tripartite Wages and Productivity Board sa Western Visayas.

Suno kay Department of Labor and Employment 6 Asst. Regional Director Salome Siaton, kon ma-aprobahan sang NWPC ang rekomendasyon, isumiter ini sa secretary sang DOLE. Sa tion nga aprobahan sang DOLE secretary, ibalik sa region ang wage order kag igapublish sa newspaper of general circulation sa sulod sang 15 ka adlaw.

Ginpahayag ni Siaton nga posible may na-schedule na ang NWPC sang deliberation para sa rekomendasyon sang RTWPB bangud may direktiba halin sa presidente angut sa minimum wage increase.

Una na ginpahayag ni Mr. Wennie Sancho, secretary general sang General Alliance of Workers Association, nga mahimo maimplementar ang bag-o nga minimum wage sa agosto subong nga tuig. (AGB)