PSTMO teams, nagapangdakup sang mga illegal nga nagaparking; violators, magabayad man sa LTO suno kay PSTMO head Jeck Conlu

Iloilo City–Adlaw-adlaw na ang paglibot sang teams sang Public Safety and Transportation Management Office agud mangdakup sa mga naga-illegal parking.

Suno kay PSTMO Head Jeck Conlu, may anum ka teams sila nga nagalibot sa dalanon agud masiguro nga wala sang illegal parking nga isa sa mga rason sang pagpugok sa trapiko. Ginatutukan subong suno kay Conlu ang mga karsada nga ginakay-o pareho sang Timawa Avenue.

Plano ni Conlu nga hingyuon sa City Council nga pataasan ang penalidad sa mga nagalapas sang City Ordinance batuk sa illegal parking. Istoryahon man sini si Mayor Joe Espinosa kon makabalik na sa syudad agud mahitsu ang iban pa nga tikang batuk sa illegal parking.

May dugang naman nga balayran sa Land Transportation Office ang mga salakyan nga illegal nga nagapark. Suno kay Conlu, gintapikan ang mga salakyan nga illegal nga nakapark sa dalan mensahe nga nasulat sa bond paper nga ginadumili ang pag-park sa Timawa Avenue. Pa-athag ni Conlu, naka-alarm na sa LTO ang mga salakyan nga natapikan sang papel kag pagabayaran ini sang tag-iya kon magparenew sang rehistrasyon sang iya salakyan.

Una na nga ginhambal ni Conlu nga nagabutang sila sang “No Parking” signages apang ginapahigad. (AGB)