Petition For Recount Sang Napierde Nga Kandidato Sa Pagka-Punong Barangay Sa San Juan, Molo, May Schedule Na

Molo, Iloilo City — May skedyul na ang pag-akto sa petition for recount sang napierde nga kandidato sa pagka-punong barangay sa San Juan, Molo nga si Mr. Joe Maloto.

Nagdaug sa bag-o lang natapos nga barangay kag SK elections sa nasambit nga barangay si anay punong barangay Pascual ‘Sipil’ Espinosa. Walo ka boto lang ang abanse ni Espinosa nga may 2,323 votes kon ikumparar sa 2,315 votes ni Maloto.

Suno kay Maloto, may nakita nga mga deperensya ang iya watchers pareho sang ginpahayag nga erasure sa tally sheet sa precinct number 1013-a gani nagdesisyon siya nga magfile sang petition. Lima ka presento ang sakup sang petition for recount ni Maloto nga nagasto sang 125 mil pesos para sa recount.

Gina-abi-abi naman ni punong barangay-elect Espinosa ang petition for recount ni Maloto.  Suno kay Espinosa, kinamatung man ni Maloto nga magkwestyun kag handa man siya nga batunon ang resulta sang petition.

(att)