Pagdakup sang tambay sa syudad, wala pa sang basehan suno kay Councilor Joshua Alim
Iloilo City – Dapat nga magiyahan ang local government units sa pagpatuman sang mandu tuhoy sa pagdakup sa mga tambay suno kay Councilor Joshua Alim agud malikawan ang konflikto.
Sa subong suno sa konsehal, wala sang ordinansa ang syudad nga nagadumili sa pagtambay sa kilid sang dalanon. Ang madumduman lang ni Alim amo ang ‘Curfew for Minors’ Ordinance kag ang ordinansa nga nagadumili sa pag-inom sa sidewalks. Kon may mga naga-tambay naman nga magahud ukon nagahimo sang gamo kon disoras na sa gab-i, pwede sila madakup bangud sa alarm and scandal.
Tun-an pa ni Alim ang mga ordinansa sa iban nga LGUs kon paano nila ginpatuman ang mandu.
Nakita sang konsehal nga maayo ang tuyo sang mandu ni Presidente Rodrigo Duterte apang nagakabalaka lang siya nga mangin unfair ang pagpatuman sini ilabe na sa mga pigado. (JoMaque)