Mayor Joe Espinosa, nag-appoint sang bag-o nga board of directors sang Metro Iloilo Water District; MIWD, mapasaka sang kaso batuk sa alkalde kasunod sang iya aksyon

Iloilo City–Nag-appoint sang bag-o nga mga miembro sang Metro Iloilo Water District Board of Directors si Mayor Joe Espinosa.

Ginconfirmar ni MIWD General Manager Imelda Magsuci nga nabaton nila ang kopya sang appointment papers kahapon. Suno kay Magsuci, naghalin sa Local Water Utilities Administration ang appointment papers kag pirmado sang alkalde bilang appointing officer.

Gin-appoint ni Mayor Espinosa sanday Felicito Tiu para sa business sector; Rebecca Maravilla sa women sector; Dr. Ray Celis sa civic sector; Architect Antonio Sangrador sa professional sector; kag Ronald Raymund Sebastian sa education sector.0

Indi dungan suno sa iya ang pag-appoint ni Espinosa sa mga bag-o nga miembro sang MIWD board kon basehan ang mga petsa sang pag-issue sang appointment papers. Mayo 22, Mayo 23 kag Mayo 28, 2018 ang nabutang nga mga petsa sa appointment papers.

Ginpahayag ni Magsuci nga wala gid sila ginpahibalo nga may gin-appoint na nga bag-o nga miembro sang MIWD board si Espinosa kag sa LWUA na lang  sila nakahibalo sang ginpadal-an sila sang kopya sang appointment papers.

Indi naman maka-function bilang bag-o nga board of directors sang MIWD ang mga appointees sang alkalde bangud wala pa sang confirmation halin sa LWUA kag wala pa sang comment halin sa MIWD suno kay Magsuci.

‘Mapasaka kaso’

Mapasaka sang kaso ang MIWD batuk kay Mayor Espinosa suno kay Atty. Roy Villa, legal counsel sang water district.

Lapas sa laye suno kay Villa ang ginhimo ni Mayor Espinosa bangud nag-appoint ini nga wala naghalin sa listahan sang MIWD Corporate Secretary base sa Presidential Decree 198, ang laye nga naga-govern sa mga water districts.

Una na ginpa-athag ni Espinosa nga ginsunod niya ang ruling sang Korte Suprema sa kaso sang Cebu Metropolitan Water District nga nagdeklarar nga unconstitutional ang probisyon sang laye sa appointing authority kag ginbalik sa mayor sang Cebu City ang otoridad sa pag-appoint sang mga miembro sang Board sang water district. Suno naman kay Villa, indi magamit ni Espinosa ang ruling sang Korte Suprema sa sitwasyon sa MIWD. Kon luyag sang alkalde, mas maayo suno kay Villa nga magfile sang kaso agud maathagan sa desisyon sang SC. (AGB)