Sangguniang Panlalawigan, naghingyo sa PNP nga imbestigaran sang maid-id ang kamatayon sang Ilonggo nga si Genesis Argoncillo alyas Tisoy
Iloilo City — Nagahingyo ang Sangguniang Panlalawigan sa Philippine National Police nga imbestigaran sang ma-id-id ang kamatayon sang Ilonggo nga si Genesis Argoncillo alyas Tisoy samtang preso sa Novaliches Police Station sa Quezon City.
Gin-aprubahan sang SP ang resolution ni 3rd District Board Member Manny Gallar, chairman sang Committee on Public Order and Safety, nga nagatuyo sa pagpalab-ut sa PNP sang sentimento sang Iloilo sa natabu kay Argoncillo nga tumandok sang Barangay Bagongon, Concepcion.
Hunyo 15 sang gab-i sang gindakup si Argoncillo bangud nga wala sang suksok nga tshirt suno sa iya pamilya apang napatay ini sang Hunyo 19. Base sa death certificate, napatay ang Ilonggo sa severe blunt force trauma sa guya, liog kag upper extremities. Nakasuhan na ang duha ka inmates nga gintudlo nagkastigo kay Argoncillo. (JoMaque)