1st District Congressman Richard Garin, handa nga batunon ang responsibilidad kon piliun siya sang PDP laban nga may standard bearer sang partido sa probinsya sang Iloilo

Iloilo City–Batunon ni first district of Iloilo Congressman Richard Garin ang responsibilidad kun pili-un siya sang PDP Laban nga mangin kandidato sa pagkagobernador sa probinsiya sa May 2019 elections.

Pero ang pagpili sang kandidato sa pagkagobernador suno kay Garin, provincial chairman sang PDP sa Iloilo, magaagi pa sa proseso. Base sa proseso, ang provincial chairman maga-endorso sang mga kandidato nga pilian sang national council sang PDP.

Gin-athag sini nga wala pa na-endorso si third district Congressman Arthur ‘Toto’ Defensor Jr nga kandidato sang partido sa gubernatorial race.

Gin-ako ni Garin nga may edge na si Congressman Defensor bangud ginlawag ini ni House Speaker Pantaleon Alvarez sang nagbisita ini sa Iloilo sang damlag lang sa mass oath taking sang mga barangay officials sa Iloilo Convention Center.

Sa karon suno kay Garin, neutral pa ang pamilya bisan nga ginabati-bati na nga maga-tandem sila sang mga Defensor.

Suno kay Garin, wala pa ini naistoryahan sang pamilya kag wala pa man nakapalapit sa ila ang mga Defensor ukon ang kampo ni fourth district Congressman Ferj Biron nga interesado man sa posisyon sang pagka-gobernador. Lunsay lang suno sa iya pabati-bati ang nagakatabu.

Ang maathag suno kay Congressman Garin nga kun wala sang Garin nga makandidato sa pagka-gobernador sa masunod nga eleksyon, pat-od nga may Garin nga mapadalagan sa pagka-bise gobernador. (AGB)