Pension sang GSIS pensioners nga wala nakaparevalidate sang ila account antes ang deadline, temporaryo nga suspendido; pila ka pensioners, nagwangal nga wala napahibalo sang GSIS
Iloilo City–Temporaryo nga suspendido ang pension sang mga Government Service Insurance System ukon GSIS pensioners nga wala nakapa-revalidate sang ila account tubtub Hunyo 30.
Suno kay Ms. Ma. Vilma Fuentes, GSIS-Iloilo Branch Manager, indi makabaton sang pension sa Hulyo ang mga wala nakapa-revalidate. Apang kon makaparevalidate sila subong nga bulan, masulod naman sa Agosto 8 ang ila pension para sa Hulyo.
Gina-engganyo ni Fuentes ang mga pensioners nga may edad 79-anyos panubo nga mag-avail sang Annual Pensioner Information Revalidation ukon APIR paagi sa pagdala sang ila ID card sa mga GSIS Wireless Automated Processing System ukon G-WAPS sa syudad kag pila ka banwa sa probinsya sang Iloilo, Guimaras kag Aklan.
Exempted naman sa APIR ang mga pensioners nga naga-edad sang 80-anyos pasaka.
Ginpahanumdom man sini sa mga pensioners nga magpa-revalidate kada tuig kadungan sang ila birthday.
Ginabanta 6,000 pa ka mga miembro sang GSIS sa Iloilo ang wala nakaparevalidate sang ila account.
‘Wala naka-inform’
Nagwangal naman ang pila ka pensioners sang GSIS sa indi pagpahibalo sa ila sang temprano sa deadline sang APIR.
Suno kay alyas Erning, 69 anyos, nakabati lang siya sa iban nga pensyonado nga nakabaton sang text message nga June 30 ang deadline sang revalidation sang ila account. Ginpahayag ni Erning nga wala na siya naghulat sang text message kag nagdagon-dagon na lang sa pagkadtu sa GSIS office agud magpa-revalidate sang Hunyo 27.
Apang indi sigurado si Erning kun may paabuton siya nga pension sa Hulyo bangud wala man ginpaathag sang GSIS management kun ano ang ila dapat nga himuon//
Wala man sang ideya si alyas Flor sa deadline sang APIR kag nabatian niya lang sa Aksyon Radyo. Gilayon ini nga nagpadulong sa GSIS office agud maghingyo nga hatagan sang kahigayunan ang mga wala pa nakaparevalidate bangud kinahanglan man nila ang ila pension sa ginabakal nga maintenance. (AGB)