1 patay,1 pilason sang nabungguan sang Isuzu D-Max ang motorsiklo sa Lambunao

Lambunao, Iloilo–Isa ang patay kag isa ang pilason sang nabungguan sang Isuzu D-Max ang motorsiklo sa Barangay Maribong, Lambunao kaina sang kaagahon.

Ginkilala ni PO1 Risan Larroza, traffic investigator sa Lambunao MPS, ang napatay kay Carlos Silva, 20 anyos sang Malapawe, Calinog nga back rider sang motorsiklo. Pilason naman ang driver sang motorsiklo nga si Gebie Silva, 21 anyos sang San Nicolas, Calinog kag pakaisa sang napatay.

Suno kay PO1 Larroza, naga-agi sa ginakay-o nga dalan ang Isuzu D-Max nga ginamaneho ni Captain Zabelle Cañon, miembro sang Philippine Army sa Camp Peralta, Jamindan, Capiz, sang gulpi lang naglusot ang motorsiklo sang mga biktima.

Wala sang suga ang motorsiklo gani wala natalupangdan ni Captain Cañon. Naghisugot naman ang ginikanan sang mga biktima kag si Captain Cañon nga aregluhon ang natabu. (AGB)