(UPDATE) Monica-Blumentritt City Proper Punong Barangay Keith “Dabing” Espinosa, wala pa nakakadto kay ICPO Director Henry Biñas angut sa iya security concern suno kay ICPO spokesperson Shella Mae Sangrines

Iloilo City–Wala pa nakakadto kay Iloilo City Police Office Director Senior Supt. Henry Biñas si Monica-Blumentritt, City Proper Punong Barangay Keith “Dabing” Espinosa.

Suno kay ICPO Spokesperson Senior Inspector Shella Mae Sangrines, wala siya sang nabaton nga impormasyon nga may appointment si Espinosa kay Biñas.

Una na nga ginhambal ni Police Regional Office 6 Director Chief Supt. John Bulalacao nga dapat magpalapit si Espinosa sa ICPO Director kon may concern ini sa iya seguridad kag kon maclear ang pangalan sini sa ginpahayag involvement sa illegal drugs.

Sa interview sang Aksyon Radyo kay Bulalacao kahapon, Hulyo 17, ginbuyagyag sini nga may impormasyon nga protector ang punong barangay sang illegal drug transactions sa iban nga lugar sa syudad.

Suno pa kay Bulalacao, may impormasyon man nga nagapadayon ang illegal drug transactions sang bana sang punong barangay nga si anay Barangay Kagawad Jesus “Jingjing” Espinosa bisan preso sa Iloilo District Jail sa Nanga, Pototan kag nagapakighimbon pa ang pila ka jail personnel sa iya. (AGB)