(UPDATE) Pagtiro-Patay Sang Soldado Sa Kasubong Niya Nga Soldado Sa Ila Kampo Sa Tapaz, Capiz, Isolated Case Suno Sa Philippine Army

Capiz — Ginakabig nga isolated case sang Philippine Army ang pagtiro patay sang soldado sa kasubong nga soldado sa kampo sang Philippine Army sa Tapaz sang Hulyo 19.

Suno kay Captain Eduardo Precioso Jr, spokesperson sang 3^rd Infantry Division sang Philippine Army, wala sang away ang biktima nga si Private First Class Delio Sebarillo, 37 anyos sang Pali Benedicto, Mandurriao apang naga-istar na sa Manapla, Negros Occidental, kag ang suspek nga si PFC Sargie Labao, 28 anyos sang Bato-Bato, Mambusao, Capiz.

Nagapadayon pa ang imbestigasyon suno kay Precioso kon ano gid ang motibo sa krimen. Manugbulos na si Sebarillo sa guard post kag outgoing naman si Labao sang natabu ang insidente. Preso si Labao sa Tapaz Police Station.

Ginconfirmar naman ni SPO4 Rufo Sarmiento, deputy station commander sang Tapaz Police Station, nga wala sang blotter report nga may away ang duha ka soldado. Ginpahayag nga may 15 ka igo sang bala si Sebarillo samtang walo ka empty shells nga compatible sa 9mm caliber pistol ang narecover sa crime scene.

(att)