Soldado nga tumandok sang Mandurriao, patay sang gintiro sang iya pareho nga soldado sa kampo sang Philippine Army sa Tapaz, Capiz kaina sang kaagahon

Tapaz, Capiz–Patay si Private First Class Delio Sebarillo, 37-anyos sang Pali Benedicto, Mandurriao, apang naga-istar na sa Manapla, Negros Occidental matapos gintiro sang kasubong nga suldado sa sulod sang kampo sang 61st Infantry Battalion, 3^rd Infantry Division sang Philippine Army sa Lagdungan, Tapaz, Capiz mga alas 4 kaina sang kaagahon.

Ginkilala ang suspetsado kay PFC Sargie Labao, 28-anyos sang Barangay Bato-bato, Mambusao, Capiz, nga preso sa Tapaz Municipal Police Station.

Assign ang duha sa 1^st Platoon, Bravo Company sang 94^th Infantry Battalion sa Negros Occidental apang gin-augment ang ila company sa 61^st IB.

Suno kay SPO4 Rufo Sarmiento, sa inisyal nga impormasyon, tatlo ka pilas ang ila nakita sa lawas sang biktima—sa likod, tiyan kag wala nga abaga tuga sang 9mm caliber pistol.

Suno naman kay Mildred Sebarillo, iloy sang napatay nga suldado, wala gid siya sang ideya sa motibo sang pagpatay sa iya bata. Nahibaluan ni Mrs. Sebarillo ang natabu matapos gintundaan siya sang asawa ni PFC Sebarillo.

‘Wala pa sang motibo’

Padayon nga gina-imbestigaran sang Tapaz police ang motibo ni PFC Labao sa pagpatay kay PFC Sebarillo.

Suno kay SPO4 Sarmiento, wala sang nakasaksi gani wala gid sang detalye sa natabu.

Base lang sa pagpangusisa sang police, duha ka bulan nga na-confine si Labao sa Victoriano Luna Medical Hospital ukon AFP General Hospital sa Quezon City.

Ginpahayag nga ma-duty na si Sebarillo samtang manuguwa na si Labao sang natabu ang insidente. (AGB)